Бөлісу:

КЕЗДЕСЕЙІК

Балалығым алыстап қалды-ау менің,
Бал күндерім қияға самғау ма едің?..
Жүйке бұзар тірліктен жүдегенде,
Сен есіме түсесің Балдәуренім.

Емін- еркін есепті шығаратын,
Көшіргім кеп отырса, ұға алатын-
Ерке қыз-ау, баяғы күйімізше,
Ұстаздардың тыңдайық ұлағатын.

Сақта мәңгі, балалық кезді есіңде,
Зымыраған уақыт тез көшуде.
Көп жыл өтті, бәріміз оралайық,
Алтын ұя – мектепке кездесуге.

Күйбендіктен қашып жүр маза бүгін,
Жүрегіңнің жарасын жазады кім?
Оралғанмен мектепке, оралар ма,
Қайран менің кіршіксіз тазалығым…

Шаттығымның шарасы шайқалмаған,
Сол күндерді құдай-ау, қайтар маған.
Ерке қызға енді айтып керегі не,
Баяғы бір сырыңды айта алмаған.

Әрбір бала -боп кеттік- әр үй бүгін,
Кездеспесек бір-бірін таниды кім?
Бітпейтұғын тірлікті жиып қойғын,
Бір сәт еске түссінші сәбилігің.

Сақта, мәңгі балалық кезде есіңде,
Зымыраған уақыт тез көшуде.
Мына жалған тірлікте жайың болмай,
Жүрсең-дағы келші бір кездесуге.

Алушы ең ғой сабақтың ұғып бәрін,
Қиялдағыш кезіңді ұмытпағын.
Көңіл- шыны, қирайтын кездері көп.
Құрап алып қайтайық сынықтарын.

Бүгін басқа, беу құрбым, кешегіден,
Мәселелер түйінін шешеді кем..
Бұл тірліктің есебі күрделі екен,
Оқушының ең қиын есебінен.

Шебер едік қиялға шетімізден,
Қайтпаушы едік бір алған бетімізден.
Бұл өмірдің қиыны, қателессек,
Құтылмайды екенбіз «екімізбен».

Мәнді, мәнсіз өтуде тез күндерім,
Ащы-тәтті тірліктің сездім көбін.
Көктем едік, тек қана көктем едік,
Өтудеміз өмірдің мезгілдерін…

Өмір жолын ойлаушы-ек тіке деп те,
Ұшырады ұқсасақ үпелекке…
Көктем едік, бәріміз гүл едік-ау,
Кетпейікші айналып тікенекке.

Барлық істі бір сәтке доғарайық,
Балалықты ұмыту болар айып.
Сол күндердің соғып тұр қоңырауы,
Алтын ұя мектепке оралайық!
Қазыбек ИСА
1989 жыл

Бөлісу:

ӨМІР-ӨЗЕН
Арғы беттен тапқаннан соң айымын,
Күні бойы соған жету жайы – мұң…
Өзенге емес… қайғыға бұл батады…
Қайықшы шал қалдырмаса… қайығын…

Ұлы Сырдың жағасына жабысып,
Отырады кеткендей бір бағы ұшып…
Бітпейді деп бүгінменен бұл өмір,
Жұбатады толқындар да жарысып…

Қалғансырдың* қалақтай бір жігітін,
Күттіреді күндей сұлу күні-түн…
Қайықшының қабағына байлапты-ау,
Мұның барлық үкілеген үмітін…

Қырға шықса, қырына алар ел несін,
Жидырады жебей соққан жел де есін…
Көл айналған көкала үйрек қанаты,
Сусылымен басар көңіл пернесін…

Айлы түннен әуен тыңдап әрқилы,
Айкезбедей ай астында шалқиды.
Айдындағы ай сәулесін аулаумен,
Аймаңдай қыз көз алдында қалқиды…

Жетім жігіт жетілмейді деп пе едің…
Жабығады есіне алса, өткенін.
Күрсінісі күндік жерге жеткенін,
Сезеді ме тәкаппар қыз көп-көрім…

Қаттылыққа қайран жүрек көнеді,
Тәттілікті тек түсінде көреді…
Ащыкөлде өскен соң ба, бұл тірлік,
Ащылығын аямай-ақ келеді…

Қызылқұмға өте алмаған шағында,
Шағалалар жеткізбейді шағылға…
Жағалауды жағалаудан жалықпай,
Сары бала сарғаяды сағымға…

Бозарғанша ішкен кезде бозаны,
Бозбаланың өзек өртер өз әні…
Арғы бетке асырардай айқайын,
Күні бойы көкке даусын созады…

Көрінгенде көркем тоғай әр талы,
Көркеміне іңкәрлығы артады.
Талып ұйықтап кеткен кезде тал бойы
Таңғы шапақ тағы да алға тартады…

Тағдыр кімге тастай қойсын көпшікті,
Өгей ұлдай өнебойы өксітті…
Өмір бірақ… өріс аша бастады,
Қайықшы шал…
Қайынатасы боп шықты!..

Азабы мен ғажабы да тең келер,
Тіршілікке сүйген жарың өң берер.
Жаратқанның жар болғанын көрді ғой,
Жарылқасын Алла, деумен келген ер…

Шынға айналып аңсаған бар елесі,
Көрінді алдан көрікті өмір белесі…
Жағалауға келгенде қол ұстасып,
Күтіп тұрды… Ұлы Бақыт кемесі!

Қазыбек ИСА
05 қазан 2013 жыл
*Сыр бойындағы ауыл

Бөлісу:

Көңілім көптен жүрген-ді менің басылып,
Адымды тұсар адасуларға ашынып.
Үйіме келсем үйірілген мұңнан арылмай,
Ойыншық біткен  қалыпты жерде шашылып…

Жүрегім еріп, суретке мынау сүйкімді,
Бойымды билеп алғаны лезде күй түрлі.
Жан ботам менің жатқандай ойнап бөлмеде,
Көзімнің алдын көлбеді сәуле сиқырлы.

Оны олар Тоқаевты шығарып саларда.. еске түсірді.

Иә, құдайға шүкір, құдайдан былай емес депутаттар да өздерінің адам екендіктерін естеріне түсіре бастады… 15 сәуірде Қасым-Жомарт Тоқаев БҰҰ Бас хатшысы орынбасары-Женева департаменті директорыболып аттанып кетіп барады… «Орнына кім болады екен?» деген сұрақ Елбасы айтқандай, бүкіл елді «гуілдетуде…»

ҚазТАГ тілшісінің осындай сұрағына сенатор Тасбай Симамбаев былай деп жауап беріпті:

– Болжамдар өте көп. Бізде кристальдай таза жігіттер өте көп деп ойлаймын…(Тоқаев секілді – ҚазТАГ). Бірінші Құдай біледі, екінші –Нұрсұлтан Әбішевич біледі. Ертең сағат 3-те… біз бәріміз бірге Қасым-Жомарт Кемеловичті шығарып саламыз. Еркектерше қол алысып, құшақтасып, бір кесе шәй ішеміз. Біз адамбыз ғой…

Сөйтіп, Симамбаевтың сипаттауынша, депутаттар да адам қатарына жатады екен… Тек, өздерінің адам екендіктері араларынан нағыз адам,Сенат төрағасы Тоқаев кетіп бара жатқанда ғана естеріне түскені өкінішті-ақ…

Қ.СЕЙХУНИ

Бөлісу:

Ордалы Оңтүстіктегі қызырлы Қызылқұмның төрқаласы, шежірелі Шардарада елінің тәуелсіздігі үшін басын бәйгеге тіккен батырларымыздың бірегейі, бар қазаққа бас қолбасшы болған Алатау батырға ас беріліп, ұлы тұлғамыздың ұлықталғаны былтыр еді. Енді міне, 23 сәуір күні Алатау батыр атындағы ауылда баһадүрдің еңселі ескерткіші ашылмақ.

Атыңа сай Алатаудай алыпсың,
Затыңа сай Қаратаудай тарихсың!
Бар қазаққа бас қолбасшы атанып,
Алатаудай атақты елден алыпсың.
Ұран салсам –шамырқанар шабыт шын!..

Бөлісу:

ОЛ ПРЕЗИДЕНТ САЙЛАУЫН БАҚЫЛАУ КОМИТЕТІН ҚҰРУДЫ ДА…
СЫРАХАНАДА ОЙЛАПТЫ…

БЕРІДОҢҒАРОВТА БЕРІ ОҢҒАРЫЛАР БЕТ БАР МА?

Қоғамдық ой-пікірді білдіріп отыру мақсатында «Айтпаркті» ашқалы айтпайтыны азайған Нұрлан Ерімбетов туралы «Ерікпеңіз, Ерімбетов мырза!» деп «Халық сөзі» газеті халық сөзін айтыпты. Тура айтқан.
Қазақша білмесе де, қазақ парламентіне қайдан және қалай келгенін әлі түсінбей жүрген Тәнірберген Бердіоңғаровтың кешегі қазақты қынадай қырып, отарлаған қызыл большевиктердің, бүгінгі Ресей мемлекетінің мерекесі – Ресей Отан қорғаушылар күні – 23 ақпанмен құттықтаған мәңгүрттігі бір бұл емес. Осының алдындағы үшінші шақырылымда да ( беті бері оңғарылмайтын Бердіоңғаров сол кезде де депутат болған. Бірпартиялы боламыз деп, осындай күйге жеткен қайран парламентіміз-ай…) осылай «оттаған». Сол кезде « Әй, бала, сен Ресейдің Думасында отырған жоқсың, шаңыраққа қарап, байқап сөйле!» деп, оны орнына қойған Амангелді Айталы секілді ұлттық намысы бар депутаттар болатын… Бұл жолы сол жарапазын тағы да қайталаған ресейшіл депутатқа Бекболат Тілеухан бастап, Нұртай Сабилянов қостап, ұлттық қаны бар депутаттар саяси қателікке тойтарыс берді.

Бөлісу:

ҚАЗАҚША НАН СҰРАЙ АЛМАЙТЫН ҚАСЫМОВТЫ ӨТКІЗУ – қазақ тілі мен ҚАЗАҚТЫ ҚОРЛАУ! Мемлекеттік тілді, яғни МЕМЛЕКЕТТІ ҚОРЛАУ! Мемлекет басшысын – ПРЕЗИДЕНТ САЙЛАУЫН ҚОРЛАУ!

Не көрмеген біздің байғұс қазақ?! Міне, енді қазақ тілін қақпайтын, қазақшасы нан сұрап жеуге жетпейтін сенатор Ғани Қасымовты кезектен тыс президент сайлауының мемлекеттік тілден емтихан алатын лингвистикалық комиссиясы зуылдатып «өткізіп жіберді»… Комиссия төрағасы Мырзатай мырза беті бүлк етпестен «Ғани Қасымов қазақша жақсы меңгерген» деп соғып тұр…

Бөлісу:

МЕМЛЕКЕТ БАСҚАРМАҚ БОЛАТ ӘБІЛОВ

МЕМЛЕКЕТТІК ТІЛ СЫНАҒЫНАН ҚАШТЫ МА?..

Қош бол, оп-по-зиция! Бұл өздерін «Азат» деп атаған ЖСДП партиясының 12 ақпандағы сьезінің шешімімен биылғы 3 сәуірде өтетін кезектен тыс Президент сайлауына қатыспайтындықтарын мәлімдегенде ауызға түскен алғашқы сөз еді…

Бөлісу:

Біздің Парламент мүшеле­рінің көбісі ойына не келсе, соны айтатынды шығарды. Әрине, ауыз өзінікі деп қоя салуға болар еді, бірақ ха­лық мүддесі , ұлт тағдырын ойыншық еткісі келетіндер Ресей тілінде сайрап жатқанда, неге біздің биліктегілердің құлдық психологиясы жойылмай қойды деген ой қаныңмен бірге басыңа шапшиды…

Бөлісу:

СОНДА БІЗ ОТЫЗ ЖЫЛДАН СОҢ ҒАНА «СӨЙЛЕЙТІН» ҚОЖАНАСЫРДЫҢ «кейіпкеріне» АЙНАЛУЫМЫЗ КЕРЕК пе?

«Самарқанда бір әпкем бар, бұдан да өткен сорақы» дегендей, сенатор Симамбаевтың сауалына Үкімет басшысы Кәрім Мәсімов елп ете қалып, ертеңіне-ақ эфир арқылы жауап берді. Мәсімов мұртынын күліп тұрып, «мемлекеттік тілге енді 10 жылдан кейін, 2020 жылы ғана көшеміз» деп былш еткізді. Біреу бетімізге түкіріп жібергендей, жалма-жан қол орамалымызды іздедік…
Тоқ күлкісі сыртқа теуіп, жылтырап тұрған Кәре¬кеңнің жүзінен аса бір ризашылық кейіп танылып тұрды…